عندك افكار لافلام قصيره تعال نبيك هنا

[الكافخ]

بسم الله الرحمن الله الرحيم


السلام عليكم ورحمة الله وبركاته


هلابكم ومسهلا اخواني الكرام .. وبدون مقدمات وزحمه .. ابخشششششششش دغري على ماقالو اخوانا السودانيين ..


السنه الي راحت الي هي 1431هـ .. انتجنا افلام قصيره .. شي نزلانه بالمنتدى وشي باليوتيوب والحمد لله تلقينا ردود افعال منقطططططعه النظير ماكنا نتوقعها


اما الجديد بالسالفه ان تقل جازلنا الوضع و ودنا نستمر وننتج افلام قصيره جديده ولاننا نطمح للافضل ان شاء الله ودنا تشاركونا بافكاركم

وان شاء الله كل الامكانات موجوده بس نبي افكار زينه .


. بانتظاركم .

[الكافخ]

تكفينا لو مجرد فكره ..

اما الي براسه الفكره مع سيناريو فمافيه مانع وزيادة الخير خيرين

و نتمنى تكون المشاركات او الاستفسارات والاقتراحات هنا مو بالرسايل الخاصه .. حتى يشارك الجميع بالفكره .

[Є5ţήά8]

السلام عليكم

أخوي عندي لك فكرة وان شاء الله تعجبك
اذا تبي فلم يكون مأثر وتخدم فيه مجتمعك ودينك وتنال الأجر والثواب وتكون لك صدقة جارية مابقيت
هذه المادة.
عليك بأشرطة الدعاة أمثال نبيل العوضي - خالد الراشد - عبدالمحسن الأحمد - خالد الصقعبي
وغيرهم فيها قصص من واقعنا فيها عبرة ودعوة ومأثرة جدا وتصلح تكون مادة فلم يشد

واذا تبي فكرة بسيطة
قصة أثنين اصدقاء يتربون مع بعض من الصغر حتى سن الشباب واحد يسلك طريق الهداية والثاني طريق الغواية والضلال
واجعل نهايتهم بنفس اللحظة حادث سير أو ماشابه وأظهر المهتدي ينطق بالشهادة لحظة وفاته والآخر يغني أو يقول لحظة تلقينة الشهادة ما أقدر ما أقدر

أعتقد مع قدراتكم في التصوير والاخراج سيفهم الكثير المعنى من وراء الفلم وستذرف دموع كثير من من يشاهدون
وستكون أوصلت رسالة قد يعجز الدعاة على منابرهم من ايصالها وشوف انت الأجر والثواب
اللي راح تجنيه وتخيل يوم القيامة
يعرض الفلم ويكون في صفحة أعمالك كم ستسر به عااد مدري هو صح هاذا اللي فهمته

فكرة ورأي أرجو تنال اعجابك

[سكر]

= اللي يجخون ويهتمون بالمظاهر بزياااادة وهم بالحقيقة داجين هاجين مديونين منحاشين ..

= وممكن تجيب قصة ناس طلعو للبر و ويوم بغو يرجعون خلص عليهم البنزين .. و من بكره جاهم سيل والاكل اللي معهم يخلص ويرجعون ياكلون الخبز اللي جدعوه بالبر ( بطر بالنعمه )
وتمر عليهم مواقف كثيرة .. ( احس اني نذله انا وذا القصة ههههههههههه )
يكون الفلم له اهداف اللي هي اهمية انه يكون فيه امير للرحله والوقوف معه تحت كلمته ورايه الحكيم ... و اهمية التأكيد من اغراض الرحله كامله وتجهيز السياره ..
و حفظ النعمه .. وتعلم العيش بالبر بدون أدوات الترفية والتقنية الحديثه .. وكيف يمشون ويحددون الطريق عن طريق النجوم ويوصلون لاقرب طريق سريع ..
وانت ادرى مني بالكشتات و مواقفها

= و ودي تتكلم عن شي ، الا هو ان الواحد اذا كبر شوي المفروض هو يربي نفسه بنفسه ، مب بتله اهله يركضون وراه ويربونه ويعلمونه ، اساسا الواحد اذا صار بعمر المراهقه فما فوق خلاص يعتبر نفسه كبير ويتنرفز اذا احد قعد ينصحه ويربيه ... فـ خلاص انت عاقل وفاهم وتعرف الصح من الخطأ وتعرف سنع العلوم وتشوف الناس واخلاقهم عاد رب نفسك بنفسك ، مب باتلين لك اهلك
واصنع نفسك بنفسك ، لاتعتمد على واسطه و خرابيط .. اصنع مستقبلك واصنع شخصيتك ..

= و فلم قصير كوميدي .. عن بنت تسوق سيارة و فهاوة البنات بالسواقه و كيف مايدلون ،وخوفها من الشاحنات . و موت حيل الرجال اذا زوجته توصله لدوامه وترجعه من الدوام ههههههههه
واذا وقفت بالشارع على جنب ملبقه هي وصديقتها وسواليف وضحك (زي الحركه الي يسوونها العيال )
بس عاد يبي لكم تصوير برى المدينه ، كود بـ بر ولا منطقة زي ديراب وكذا ، يكون فيها مباني وشوارع مزفلته بس مافيها ناس رايحه وجايه ولا فيها شرطه اهم شي هههه

[فيروزيه]

ههههه حلوه فكرة سكر عن السواقه ,
و بأحوس مخي وارجع ~

[الكافخ]

مرحبا بكم ..

Є5ţήά8 كلامك وفكرتك ( الاصدقاء) حلوووووه واكثر من رائعه ..

و تخبرين ياوخيتي حنا موب محترفين حنا هوااااه بس.. وفكرتك احس انها تحتاج شغل قووي و وقت واشياء اكبر من أمكانياتنا

ومافيه مانع اننا ندخلها من ظمن الافكار الي بنتناقش فيها مع فريق العمل المتواضع

وفكره الاستفاده من الاشرطه شي ممتاز وان شاء الله نشوف شي نقدر على تطبيقه


الله يعطيك العافيه والف الف على هالتفاعل والمشاركه



سكر


فكرة البر والضياع كانت من افكاراحد الشباب واذا فيه وقت ان شاء الله يمكن نطبقها ..



اما الاعتماد على النفس و حب المظاهر احس انها موب مواضيع دسمه ومانقدر ندخل من ظمنها مواظبع ثانيه

اما سواقة البنات موضوع حساس وأشغل المجتمع !! بس من بيمثل عن البنت ؟ لطيفة المجرن والا فتون ..؟

الا اذا نخليه يكون بالرسم والدبلجه .. << اول فكره تحت المنظار .


حياك الله على هالمرور



فيروزيه


فرفري وحوووسي لعلك تطلعين لنا بشي




اشكركم على تفاعلكم وبانتظار المزيد .

[الكافخ]

ددددددددقت ساعه الصفر الى الامام الى الامااااااام لا رجوووووووووووع .. الي بيقدم شي خلال هاليومين والا خلااااص ..


انتظرو جديدنا خلال الايام القادمه ان شاء الله ..

[أنا تسذا]

هاااو وين مشوت طال عمرك ،،،، أقول عوّد عوّد عندي فوتسره << ملاحظين الذرابه :121:

وش رايكم تخلون المحور عن ابليس ،، وتطرحون أي مشكله تبونها والحوار يكون مابين الانسان وابليس وكيف يغويه :64:

(طبعاً السيناريو يكون باسلوب مرح وكوميدي وفــ نفس الوقت يكون هادف ،،، وعشان توضح أكثر تلقون أباليسو مشخص فــ قوقل << نفس الفكره لكن برسم الكافخ واستهبال الباقين بيطلع انشاالله أحسن)

وبس :151:

[الكافخ]

ممتاااااازه يالذربه ..


فكرتن ممتاز ..

وتكون وسااااوس الشيطان عن مواضيع ومشاكل منتشره بالمجتمع .. ونبين ضعف بعض الأوادم ضد ابليس اعوذ بالله منه ..


انا من ناحيتي جاهز بلي تبونه وببحث بالتفاصيل وان شاء الله نلقا نص حوار مناسب و اتوقع الاستهبال الهادف اكثر واسرع انتشار من غيره



الله يعطيك العافيه اختي انا تسذا


تشكرات ..

[مزوحي]

فيه مسرحه للبثر هذاك " السلمي مدري السليم "
ومعهم واحد طالعه له قرون ينقالهه ابليس مدري الشيطان او مدري وش وضعه

الفكره الاخيره زينهِ لكن ماتوضح ان القذافي جاي ومتوزي عندهم بالمزرعه
ويطلع لهم قوانين

متمني لكم دوام التوفيق

[Preity Emzo||~]

أهاا آآجل فاتنا الوقت ..

على العمووم انا شفت لكم كم فيلم وكان حلوو مقدمآ .. وعلقت على واحد منهم في اليوتيوب ..

عندي أفكار لأفلام بس ما بعد آستوى براسي .. يعني حاليآ اجمعهم ..
وفية فكره شبيه للافكار اللي وصلتكم اللي هي عن البر :146:.. وفكرة فيلم اكشن :noor (31):..

وقبل فترة قبل ما تكتبون هذا الموضوع ..
كاان عندي فكرة براسي .. اللي هي
تعملون مسلسل مو فيلم .. لو 10 حلقات او اقل ..
المسلسل عبارة عن .. يوميات طلاب في جامعة الاقلاع ..
يعني مو قصدي جامعة الاقلاع المنتدى .. يعني جامعة تكون شبة حقيقية بس من الخيال ..
يعني يتكلم عن الطلاب وهم في الجامعه .. وش تسير معهم مواقف داخل الجامعه وخارجها ..
مثلآ يوم وتكون الحلقه تتكلم عن اماكن عوايل " وهذا حديث الشباب اليومين هذي .. و طبعآ كل حلقه لها موضوع ..
و بـ يكون كوميدي ويمكن يكون هادف شوي ..

مو لآزم الفلم اللي تسونه يكون هادف ..
يعني على الاقل واحد يكون هادف و الثاني يكون عبارة عن مواهب
..

المهم الحين ما يحتااج افكار بعدين ان شاء الله إذا الله احيانا ..

إذا محتاجين لأحد يصمم مونتاج شبة احترافي .. أنا موجوده ..
او مو لآزم يكون الفيلم كله من مونتاجي يكون مثلآ المقدمة والنهايه ..

عندي خبرة في برنامج السوني فيغاس Sony Vegas
و ادوبي أفتر افكت Adobe After Effects
طبعآ هذولآ عندي من افضل البرامج لصنع المونتاج ..
وأقدر اسوي فيهم خدع مثل اللي تشوفونه بالفلام .. مثل
يعني سيارة تنفجر وكله نصب ... او قزاز السيارة يجيه طلقات من مسدس والسيارة ماحست فيه..
او شخص منقطع جسمه ويتحرك يعني رجولة تمشي لحالهم والباقي طايح هههع
..ههه كلها اكشن ورعب ..
بس يبغى لها مصور محترف للفيديو وعارف لزوايا التقاط الفيلم ..


....

ان شاء الله كلامي ينرد علية وما يرووح على الفاضي

[الكافخ]

ناصر ..

مراحب ..

انت تعرف و ش حنا نبي بالظبط ..

عندك شي هاته هنا حتى ان الجميع يقدر يتناقش فيه .. والا مباشره



الاخت Preity Emzo||~


حياك الله


ماشاء الله عليك مبدعه اذا انتي تعرفين لمثل هالبرامج


والافكار ان شاء الله ماهي صعبه .. اقترح عليك تطبقين بعض اللقطات والحركات لو مع ناس حولك .. يطبقون حركات وتطلعون لو بدقايق فلم اكشن


وحنا ماراح نستغني عنك

اما بفكره الجامعه فكره جهنميه تواجه ألاف الطلاب بشكل يومي ولكن انتي خابره يبي مبناء وفصول ويبي اقل شي تفرغ لاكثر من اسبوع يعني يبي شغل صصصح وحنا أمكانياتنا ماتسمح لنا


ومع هذا نوعدك نقدم ونحاااااول


الله يعطيك العافيه احرجتينا بكلامك وبتفاعلك وان اشاء الله مايروح ردك وجهدك على الفاضي


وللحديث بقيه ان اشاء الله